Беласнежка і сем гномаў

У далёкія часы жыла-была прыгажуня прынцэса. Вочы ў яе былі блакітныя, як возера, губы пунсовыя, як пялёсткі руж. А твар у яе быў белы, як чысты снег. І за гэта назвалі яе Беласнежкай.

Першая дзея

Замак Бацькі Беласнежкі. Беласнежка адна гуляе з лялькай. Яна сумуе і ўспамінае дзяцінства, калі была жывая Маці і ўся сям’я была шчаслівая. Але зараз усё па-іншаму, побач з Бацькам злая і раўнівая Мачаха. Яна ненавідзіць Беласнежку і не жадае, каб Бацька і дачка былі разам.

Злосць перапаўняе Мачаху; калі чароўнае Люстэрка заклікае яе, у яго адбітку жанчына бачыць не сябе, а свайго страшнага двайніка – злоснага Важака Гоблінаў. Мачаха спачатку пужаецца. Тады Люстэрка падвяргае яе іспыту і нагадвае пра Беласнежку. Мачаха не можа стрымаць злосць і пры новым з’яўленні Важака радасна ўступае ў саюз з чорнымі сіламі.

Убягае Беласнежка і рушыць злыя чары. Бацька супакойвае яе і пераконвае ў сваёй любві. Але Люстэрка ажывае зноў, памнажае зло і выпускае Гоблінаў. Яны ўносяць Беласнежку ў Залюстроўе.
Свет Залюстроўя. Чароўны лес Эльфаў і Гномаў. Гобліны абкружылі Беласнежку і пільнуюць яе. Раптам аднекуль зверху з’яўляецца Прынц Эльфаў (бо Эльфы жывуць на дрэвах). Ён хавае Беласнежку на дрэве, а сам змагаецца з Гоблінамі. Эльфы праганяюць Гоблінаў.

Перапалоханая Беласнежка застаецца адна, яна плача. Светлячкі суцяшаюць Беласнежку і асвятляюць ёй дарогу, што вядзе да доміка Гномаў. Гномы ніколі не бачылі людзей і спачатку вельмі напужаліся, калі з’явілася Беласнежка. Але іх вясёлы нораў нарэшце перамагае страх і яны знаёмяцца з дзяўчынай. З добрымі Гномамі Беласнежка забывае ўсе сваі няшчасці.

Замак Бацькі Беласнежкі. Разам з Важаком Гоблінаў і яго світай Мачаха наладзіла свята з нагоды перамогі над абрыдлай падчарыцай. Бацька Беласнежкі сумуе па дачцэ, адзіным успамінам аб якой засталася яе лялька.

Чароўнае Люстэрка раптоўна зноў ажывае. Ізноў Мачаха бачыць у ім Беласнежку, на гэты раз з Прынцам Эльфаў.

Мачаха жадае канчаткова расправіцца з Беласнежкай; яна знімае з сябе каралі і зачароўвае іх. Разам з Важаком і Гоблінамі яна ўцякае ў Залюстроўе. Услед за імі на дапамогу дачцэ туды накіроўваецца Бацька.

Другая дзея

Домік Гномаў. Гномы пайшлі на працу: яны здабываюць золата і каштоўныя камяні. Беласнежка засталася адна ў іх чароўным доміку.

Раптам навокал усё мяняецца. Гэта ажылі Шафа, Мяцёлачка і Шуфлік; яны жадаюць палепшыць адзіноту Беласнежкі. А Шафа так зачаравана дзяўчынай, што дoрыць ёй каралі, золата для якіх здабылі Гномы і аддалі ўпрыгажэнні на ахову. Мяцёлачка крыўдзіцца, што Шафа не звяртае на яе ўвагу, але добрая Беласнежка дзеліцца з ёй ўпрыгажэннямі. Усе пасябравалі.

Вяртаюцца з працы вясёлыя гномы і ўчыняюць у доме страшэнны беспарадак. Беласнежка засмучаная іх паводзінамі. Гномам сорамна. Яны выпраўляюцца і хутка наладжваюць у доме парадак.

Лясная паляна. Гномы зрабілі для Беласнежкі арэлі, такія ж, як у яе замку. Беласнежка калыхаецца на іх і марыць пра Прынца Эльфаў, якога яна пакахала і, здаецца, узаемна. Арэлі закалыхваюць яе і яна засыпае.

З’яўляецца Мачаха з Важаком Гоблінаў, яны падкідваюць Беласнежцы заварожаныя каралі і хаваюца. Беласнежка прачынаецца, бачыць каралі і прымае іх за падарунак Прынца; яна адзявае іх – і зараз жа падае. Калі вяртаюцца Гномы, яны бачаць нежывую Беласнежку.

Мачаха і Гобліны трыумфуюць. Храбрыя Гномы кідаюцца ў бой, каб адпомсціць за Беласнежку. Але ім ніколі не перамагчы страшнага Важака! На дапамогу ім прыходзяць Эльфы на чале з Прынцам. У паядынку Прынц забівае Важака. З яго смерцю Мачаха губляе сваю чароўную сілу.

Гномы і Светлячкі моляць Прынца вярнуць Беласнежку да жыцця. Прынц спрабуе разбудзіць яе, але Беласнежка не прачынаецца. У адчаі ўбягае Бацька. На жаль, ён прыйшоў занадта позна. Тады Прынц, з апошняй надзеяй выратаваць Беласнежку, здымае з яе заварожаныя каралі і цалуе дзяўчыну. Беласнежка расплюшчвае вочы. Побач з ёй Бацька і яе выратавальнік – Прынц Эльфаў. Усе шчаслівыя. Прынц просіць рукі Беласнежкі.

Палац Эльфаў. Эльфы, Гномы, Шафа, Шуфлік, Мяцёлачка і Светлячкі святкуюць вяселле Беласнежкі і Прынца.