Рыгалета

Першая дзея

Двор Герцага Мантуанскага — сапраўдная школа пачварства і вытанчанай распусты. Герцаг і прыдворныя бавяць час у бясконцых оргіях, балях, любоўных уцехах. Выкраданне каханак і каханкаў для свайго гаспадара — захапляльная авантура для яго світы. Любімчык Герцага, блазан Рыгалета, замучыў усіх з’едлівымі кпінамі. Зласліва насміхаецца ён і над горам старога графа Мантэронэ, які прыйшоў да Герцага, каб абвінаваціць яго ў гвалтаванні сваёй дачкі. Разам з Герцагам Мантэронэ праклінае Рыгалета і плюе яму ў твар.

Узрушаны да глыбіні душы, блазан шукае абароны ў Герцага і прыдворных, аднак усе з пагардай адварочваюца ад яго. Упершыню зараджаецца ў Рыгалета думка адпомсціць Герцагу за ўсе знявагі. Нібыта прачытаўшы яе, целаахоўнік Герцага Спарафучыле прапануе Рыгалета за плату ўбраць любога чалавека…

Рыгалета турбуе лёс уласнай адзінай дачкі, якую ён, як яму здаецца, надзейна схаваў ад усіх. Але Герцаг аднойчы ўбачыў Джыльду, пад відам беднага студэнта пазнаёміўся з ёю і выклікаў у дзяўчыны давер і пяшчоту. Прыдворныя высочваюць Рыгалета, калі ён наведвае дачку. З мэтай адпомсціць ненавіснаму насмешніку яны выкрадаюць дзяўчыну і адвозяць да Герцага. Сам таго не ведаючы, Рыгалета робіцца саўдзельнікам злачынства.

Другая дзея

Мімалётны сум ахапіў Герцага. Ён марыць аб Джыльдзе. Не ведаючы планаў сваіх прыдворных, Герцаг прыйшоў ноччу да дому дзяўчыны і застаў яго пустым. Але неўзабаве ўсё высвятляецца — яна тут, у палацы! Хутчэй да яе! О, як незвычайна гучыць песенька блазна, калі ён з’яўляецца ў пакоях Герцага пасля выкрадання Джыльды! Дзе, за якімі дзвярыма яе схавалі? Але вось сама Джыльда выбягае з аднаго з пакояў. Рыгалета клянецца адпомсціць за ганьбу дачкі. Дзяўчыну палохае злоснасць бацькі, яна просіць яго не губіць душу забойствам. Для ўсюдыіснай світы пакуты блазна — яшчэ адзін спектакль таленавітага акцёра…

Трэцця дзея

Рыгалета гатовы да забойства. Ён прагне крыві Герцага і вырашае звярнуцца да паслуг Спарафучыле. У пагоні за вострымі адчуваннямі Герцаг прыходзіць да свайго целаахоўніка, які разам з сястрой, красуняй Маддаленай, утрымлівае прытон. Герцаг захапляецца Маддаленай. Сведкам любоўнай сцэны паміж імі робіцца Джыльда, якую бацька прывёў сюды, каб яна пераканалася ў нізасці Герцага. Маддалена зачаравана маладым прыгажуном і просіць брата пашкадаваць яго. Пасля доўгіх угаворванняў Спарафучыле згаджаецца забіць першага, хто пастукае (пастучыць) ў іх дзверы. Джыльда, якая вярнулася, каб папярэдзіць Герцага аб пагражаючай яму небяспецы, чуе гэтую размову. Нягледзячы ні на што, яна кахае Герцага і гатова выратаваць яго цаною свайго жыцця. Пад воўчае выццё світы Джыльда ўваходзіць у дом Спарафучыле. Вяртаецца Рыгалета. Спарафучыле выносіць яму скрыню з мёртвым целам. Блазан трыумфуе — нарэшце ён адпомшчаны! Але раптам ён чуе голас Герцага. Хто ж у скрыні? Джыльда, дачка, адзіная любоў, стала ягонай ахвярай…