Гісторыя культуры і мастацтва кожнага народа ніколі не развіваецца ізаліравана, яе характар шмат у чым фарміруецца ў пастаянным дыялогу з іншымі культурамі. Дыялогу, які дазваляе не толькі пазнаць і зразумець, але і прыняць іншую культуру, стаць правадыром "чужой" і носьбітам "сваёй" традыцыі, выявіць уласныя механізмы развіцця і вызначыць самабытнасць сваёй культуры. Як правіла, вынік такога дыялогу, адна з форм якога – літаратурны ці паэтычны пераклад – успрыманне пачуццяў, вобразаў, думак у рамках сваёй моўнай сістэмы, магчымасць зрабіць "іншае" часткай "свайго" ўніверсальнага сэнсу, выяўленая ў стварэнні прызнаных шэдэўраў выяўленчага мастацтва, літаратуры, музыкі, паэзіі…

У гэтым сэнсе канцэрт, які пройдзе 17 сакавіка ў Камернай зале імя Л.П. Александроўскай у рамках XX фестывалю "Адраджэнне беларускай капэлы", – унікальны. Першым чынам, таму, што гэта – канцэрт-прэзентацыя кнігі перакладаў вершаваных тэкстаў вакальных цыклаў нямецкіх кампазітараў XVIII-XX стагоддзяў найвядомага беларускага паэта і перакладчыка Васіля Сёмухі. Найвысокая энцыклапедычная адукаванасць і валоданне шматлікімі мовамі гэтага Майстра дазволілі яму выканаць пераклады нямецкай, польскай, латышскай паэзіі і прозы розных эпох і стыляў; дзякуючы яму ў гісторыі нацыянальнай культуры з'явіліся "Біблія", "Найвышэйшая песня Саламонава", "Новы Запавет. Псалтыр" і "Фауст" І.В.Гётэ на беларускай мове.

Упершыню ў гісторыі беларускай музыкі жамчужыны сусветнай камернай класікі – фрагменты вакальных цыклаў Ф.Шуберта, Р.Шумана, Ё.Брамса, Р.Вагнера, Г.Малера – прагучаць па-беларуску. У выкананні маладых салістаў тэатра – лаўрэатаў і дыпламантаў міжнародных конкурсаў і фестываляў Алены Золавай і Юрыя Гарадзецкага, Наталлі Акінінай і Алены Бундзелевай, Уладзіміра Громава і Янаша Нялепы, а таксама гасцей канцэрту, лаўрэата міжнароднага конкурсу Рыгора Палішчука і салісткі Беларускага дзяржаўнага музычнага тэатра, лаўрэата міжнароднага конкурсу Лесі Лют.

У канцэрце ўдзельнічае акцёр Беларускага радыё Алег Вінярскі. Партыя фартэпіяна – лаўрэат міжнародных конкурсаў Таццяна Лойша, лаўрэат міжнароднага конкурсу Таццяна Молакава, Настасся Луцэнка, Маргарыта Гапонік, Наталля Елісеева.